Publikimet e Panelit për Lirim me Kusht
Paneli për Lirim me Kusht (më tutje: Paneli), është organ i veçantë dhe i pavarur në vendimmarrje, i themeluar nga Këshilli Gjyqësor i Kosovës në pajtim me dispozitat ligjore të Kodit Penal të Republikës së Kosovës dhe të Ligjit për Ekzekutimin e Sanksioneve Penale.
Paneli për lirim me kusht përbëhet prej tre (3) anëtarëve: një (1) gjyqtar i Gjykatës Supreme, i deleguar nga Kryetari i Gjykatës Supreme; një (1) gjyqtar i Gjykatës së Apelit i deleguar nga Kryetari i Gjykatës së Apelit dhe një (1) gjyqtar i Gjykatës Themelore në Prishtinë, i deleguar nga Kryetari i Gjykatës Themelore. Në rastet kur sipas ligjit parashihet përjashtimi i anëtarit të Panelit, Këshilli Gjyqësor i Kosovës ka emëruar edhe anëtarët rezervë për të qenë në gatishmëri për të vendosur në rastet kur me ligj parashihet përjashtimi i anëtarit të panelit në një çështje të caktuar apo zëvendësimi në mungesë të ndonjë anëtari tjetër.
Aktualisht paneli përbëhet prej:
- Rasim Rasimi, gjyqtar në Gjykatën Supreme të Kosovës – Kryesues;
- Delushe Halimi , gjyqtare në Gjykatën e Apelit të Kosovës – anëtar;
- Arben Hoti, gjyqtar në Gjykatën Themelore Prishtinë – anëtar;
- Sabri Halili, gjyqtar në Dhomën e Posaçme, Gjykata Supreme e Kosovës- anëtar rezervë;
- Hava Haliti, gjyqtare në Gjykatën e Apelit të Kosovës – anëtare rezervë;
Biljana Rexhiq, gjyqtare në Gjykatën e Apelit të Kosovës – anëtare rezervë; - Vesel Ismaili, gjyqtar në Gjykatën Themelore në Prishtinë – anëtar rezervë;
- Lumnije Krasniqi, gjyqtare në Gjykatën Themelore në Prishtinë – anëtar rezervë.
Paneli është kompetent për shqyrtimin e të gjitha kërkesave dhe propozimeve për lirim me kusht, në bazë të raporteve të përpiluara nga ekipet profesioniste të Institucioneve Korrektuese të Kosovës. Kundër aktvendimit të Panelit nuk lejohet ankesa dhe nuk mund të ngritet konflikt administrativ.
Paneli mbështetet dhe përfaqësohet nga Koordinatori, roli dhe funksioni i të cilit është përcaktuar në kuadër të Këshillit Gjyqësor të Kosovës. Koordinatori i Panelit për lirim me kusht, është përgjegjës për të gjitha punët dhe aktivitetet mbështetëse të panelit, duke u kujdesur për mbarëvajtjen e punëve të Panelit për Lirim me kusht dhe zbatimin e legjislacionit në fuqi për procedurat përkatëse me rastin e pranimit dhe shqyrtimit të kërkesave të personave të dënuar, të parashtruara nga Shërbimi Korrektues i Kosovës, si dhe koordinon aktivitetet me Shërbimin Sprovues të Kosovës, në lidhje me mbikëqyrjen e personave të liruar me kusht.
Kontakti:
Adresa: Këshilli Gjyqësor i Kosovës
Rruga Luan Haradinaj p. nr.
Prishtinë, Kosovë