Vilard Bytyqi

Prof. Ass. Dr. Vilard Bytyqi është anëtar i Këshillit Gjyqësor të Kosovës i zgjedhur nga Kuvendi i Republikës së Kosovës. Nga viti 2014 është profesor universitar në lëndët e fushës së hetimit dhe ligjit penal në Fakultetin e Sigurisë Publike, në Akademinë e Kosovës për Siguri Publike dhe mban thirrjen akademike Profesor Asistent. Në kuadër të fakultetit, Profesor Bytyqi ka ushtruar detyra dhe angazhime të ndryshme profesionale dhe funksionale, ndër të cilat: Koordinator i programit studimor; Përgjegjës i Departamentit Policor; Anëtar i Grupit Punues për hartimin e Strategjisë Zhvillimore të Akademisë së Kosovës për Siguri Publike 2019-2022; Udhëheqës i Grupit Punues për hartimin e kurrikulave të trajnimit profesional për Policinë dhe Inspektoratin Policor;  Udhëheqës i Grupit Punues për vlerësimin dhe rishikimin e programit studimor “Siguria Publike”. Në vitin 2009 ka ndjekur praktikën profesionale në Departamentin e Regjistrimit Civil - QRC Suharekë, pranë Ministrisë së Punëve të Brendshme. Ndërsa në vitin 2011 ka qenë i angazhuar nga East West Management Institute, ku ka dhënë kontribut të rëndësishëm në projektin për hartimin e Buletinit të parë të praktikës gjyqësore të Gjykatës Kushtetuese të Kosovës. Ndërmjet viteve 2011 - 2013 ka shërbyer si zyrtar apo udhëheqës i shërbimeve juridike në disa shoqëri tregtare, sikurse “Interpress”, “Alma” dhe “Diambe”, ndërsa përgjatë viteve 2014-2016 ka qenë i angazhuar në projekte që kishin synim avancimin e shkathtësive dhe njohurive nëpërmjet mësimit plotësues për pjesëtarët e komuniteteve të margjinalizuara, të implementuara nga KAAD dhe Advancing Together. Gjithashtu ka qenë profesor i jashtëm në kolegjin “Juridika” (2013/14) dhe Universitetin Publik të Prizrenit “Ukshin Hoti” (2016/17, 2018/19). Profesor Bytyqi studimet bachelor i ka përfunduar në Fakultetin Juridik të Universitetit të Prishtinës (2011). Gjatë studimeve ka qenë tri herë bursist universitar, ndërsa për rezultate të shkëlqyeshme gjatë studimeve dy herë ka qenë laureat i çmimit “Student i dalluar”. Studimet master i ka përfunduar në Drejtimin Penal, në Fakultetin Juridik të Universitetit të Prishtinës (2013). Ndërsa, studimet e doktoratës nën mentorimin e Prof. Dr. Rexhep Muratit i ka përfunduar në Fakultetin Juridik të Universitetit të Evropës Juglindore në Republikën e Maqedonisë së Veriut me tezën e doktoratës me titull: “E drejta për gjykim të drejtë në procedurën penale në Kosovë” (2018). Duke qenë pjesë aktive në mësimdhënie universitare ka participuar në shumë konferenca shkencore, si dhe ka ndjekur vizita studimore në institucione të ndryshme ndërkombëtare. Ka botuar një numër punimesh shkencore në revista të ndryshme shkencore ndërkombëtare dhe vendore në fushën e ligjit, përkatësisht të drejtave të të pandehurit; të drejtën për jetë;  të drejtën e azilit; gjykatat penale ndërkombëtare; fushën antikorrupsion; organizimin e burgjeve, mbrojtjen e mjedisit nëpërmjet ligjit penal dhe fusha të tjera. Në gusht 2020 është zgjedhur anëtar i Këshillit Gjyqësor të Kosovës nga Kuvendi i Republikës së Kosovës.