Prishtinë, 15 korrik 2023 – Këshilli Gjyqësor i Kosovës (KGJK), ka organizuar testin kualifikues të kandidatëve për gjyqtarë, në kuadër të procesit të rekrutimit të dyzet e shtatë (47) pozitave për gjyqtarë në gjykatat e Republikës së Kosovë, morën pjesë 371 kandidatë, prej tyre, rreth 50% femra. Ky proces u mbajt në Akademinë e Kosovës për Siguri Publike në Vushtrri.
Komisioni për Rekrutimin e Gjyqtarëve në ditën e mbajtjes së testit, nën monitorimin e përfaqësuesve vendorë dhe ndërkombëtarë, ka përpiluar testin kualifikues për kandidatët për gjyqtarë të rinj me qëllim të rritjes së transparencës në sistemin gjyqësor.
Mbarëvajtjen e procesit të testit kualifikues e ka mbikëqyrur, Zëvendës Kryesuesi i KGJK-së, njëherësh edhe Kryetar i Komisionit për Rekrutimin e Gjyqtarëve, Qerim Ademaj, i shoqëruar nga anëtarët e tjerë të këtij Komisioni.
Zëvendës Kryesuesi Ademaj, duke u uruar suksese kandidatëve që iu nënshtruan këtij testi, vlerësoi rëndësinë që ka ky proces për sistemin gjyqësor. Po ashtu, potencoi se KGJK-ja ka ndërmarrë të gjitha veprimet që procesi i testimit të realizohet në mënyrë profesionale e të bazohet në meritokraci.
Për vëzhgimin dhe mbikëqyrjen e këtij procesi kontribuan, anëtarë të KGJK-së, kryetarë të gjykatave, gjyqtarë mbikëqyrës të degëve, gjyqtarë të gjykatave të vendit, si dhe përfaqësuesit e partnerëve ndërkombëtarë nga Organizata për Siguri dhe Bashkëpunim në Evropë – OSBE, Programi i Sektorit të Drejtësisë për Kosovën i Bashkimit Evropian – Projekti EUKOJUST dhe Grupi për Studime Juridike dhe Politike (GLPS).
Pas vlerësimit të testit kualifikues për rekrutimin e gjyqtarëve të rinj, do të vazhdohet me fazat tjera sipas Rregullores dhe në përputhje me standardet më të avancuara ndërkombëtare.
Po ashtu, njoftohen kandidatët se Komisioni i Rekrutimit është duke e vazhduar vlerësimin për testin kualifikues deri në nxjerrjen e rezultateve përfundimtare.
