Prishtinë, 13 shtator 2022 – Këshilli Gjyqësor i Kosovës (KGJK), ka përfunduar fazën e intervistimit me gojë, për gjyqtarët të cilët kanë aplikuar për ngritje në detyrë në pozitën e gjyqtarit në Gjykatën Supreme të Kosovës.
Komisioni për shqyrtimin e aplikacioneve dhe intervistimin e kandidatëve përbëhet nga: Enver Peci, kryetar i Gjykatës Supreme, njëherit edhe kryetar i komisionit, anëtarët e komisionit: Albert Zogaj, kryesues i KGJK-së, Drita Rexhaj, anëtare e KGJK-së, Teuta Ibrahimi, anëtare e KGJK-së dhe Nenad Lazić, gjyqtar në Gjykatën Supreme.
Kurse në cilësinë e anëtarit rezervë të këtij komisioni, është caktuar gjyqtari i Gjykatës Supreme, Agim Maliqi.
KGJK ka publikuar listën përfundimtare të kandidatëve që i plotësojnë kushtet për t’iu nënshtruar procesit të intervistimit, sipas konkursit të brendshëm të shpallur në ueb faqen zyrtare të KGJK-së.