Pas takimeve të mbajtura me organizatat e shoqërisë civile, Ministria e Drejtësisë është duke mbajtur punëtorinë tre ditore me gjyqtarë të niveleve të ndryshme të gjykatave me qëllim të shqyrtimit dhe adresimit të propozimeve në draftin e Kodit Civil të Republikës së Kosovës.
Gjatë ditës së parë, gjyqtarët patën mundësinë të japin komentet e tyre mbi librin e parë apo pjesën e përgjithshme të Kodit si dhe librin që rregullon dispozitat për Familjen.
Gjyqtarët komentuan mbi përvojën dhe prakticitetin e interpretimit të normave të Kodit Civil në të ardhmen. Fokusi i të gjithëve ishte mbrojtja e parimeve të përgjithshme si dhe adresimi i pengesave që kanë hasur deri tani në praktikë.
Takimi do të vazhdojë me librat e tjerë në radhë si: detyrimet, pronësia dhe trashëgimia.
Kjo punëtori u organizua me mbështetjen e OSBE-së.