Anëtarë të KGJK-së morën pjesë në diskutimin e organizuar nga Programi i USAID-it për përforcimin e sistemit të drejtësisë mbi bashkëpunimin në mes të gjyqësorit dhe Organizatave të Shoqërisë Civile (OShC). Rolet dhe përgjegjësitë e këtyre OShC-ve përfshijnë inkurajimin e qytetarisë aktive, avokimin e nevojave të qytetarëve, si dhe të vepruarit si monitorues të gjyqësorit.
Në fjalën e tij hyrëse, kryesuesi i KGJK-së, Skender Çoçaj ka diskutuar për sukseset të cilat janë produkt i bashkëpunimit në mes të KGJK-së dhe organizatave të shoqërisë civile, duke përfshirë këtu ngritjen e procedurave disiplinore ndaj gjyqtarëve, zgjidhjen e çështjeve të konfiskimit, si dhe monitorimin e publikimit të aktgjykimeve të gjykatave.
Ai tha, “Është e rëndësishme që organizatat e shoqërisë civile të vazhdojnë me raportimin në gjyqësor dhe të avokojnë gjithmonë përmirësimin e tij duke ofruar analiza dhe duke sugjeruar rekomandime praktike.”
Përfaqësuesit e OShC-ve shtuan se do të ketë rritje të këtij bashkëpunimi në mes të gjyqësorit dhe OShC-ve sepse të dyja palët i ndajnë të njëjtat objektiva duke ndihmuar kështu në arritjen e qëllimeve dhe në përparimin e gjyqësorit.